What I Know It’s About Experience

Downclocking nVidia GPU to Reduce the Heat

بعد التنبيه اللي نزلته بالمدونه وبمنتدى الكمبيوتر والانترنت بساحه الاقلاع عن مشكله كروت انفيديا 8400 و 8600 ببعض اجهزه ابل وديل واتش بي جلست ابحث عن حلول بامكان اي واحد يطبقها لتفادي مشكله ارتفاع حراره الكرت نفسه بدون مايكون فيه تفكيك وتعديل على مشتت الحراره حق اللاب توب اللي مايقدر يسويه الا المحترفين بهالمجال. طبعا للمعلوميه انا جهازي XPS M1330 من ديل يعني انا اواجهه هالمشكله وجهازي من ضمن الاجهزه اللي فيها كرت انفيديا 8400 جي اس وفيه مشكله ارتفاع الحراره بس مابعد خرب  الحمدالله فاللي جهازه خرب ماقدامه الا حل واحد يروح لاقرب محل صيانه عشان يغير له المذربورد الحركه هاذي ماتنفع للي جهازه خرب وانتهى المهم اليوم بكتب عن حل بسيط يساعد في تخفيف حراره المعالج خصوصا اصحاب لا بتوب XPS M1330 بحكم اني جالس اطبق الحركه عليه والنتائج اللي راح اوريكم اياها بعد تطبيق هالحركه ماخوذه منه

الحل ياطويلين العمر والسلامه بشكل عام هو التقليل من سرعه معالج كرت الشاشه حوالي 50 بالميه بتقولون وش خمسين بالميه صاحي انت ؟ بقولكم ماراح تفرق معك كثير اذا انت ماتستخدم لاب توبك للالعاب مثل جهازي شاشته 13.1 يعني استخدمه لشغلي ومشاهده فيديو الخ الخ و50 بالميه من قدره المعالج كافيه جدااا لتشغيل هالاشياء بدون اي مشكله ان شاءالله واذا ما اعجبك الوضع تقدر تسترجع الموضوع لما كان عليه في السابق يعني مافيه خوف ان شاءالله انه بيخرب عليك وبشكل خاص اذا لاب توبك مثلي من ديل لازم تحدث البايوز الى A12 قبل ماتطبق هالحركه بتقول من وين اقدر اجيبها ادخل على موقع الدعم الفني لاجهزه ديل وتبي تحصلها وتحديثها سهل جداا ومايحتاج احترافيه فابسم الله نبداء.

في البداية يبي لك برنامج اسمه RivaTuner  برنامج معروف عند القيمرز وحقين Overclocking اللي يحبون يكسرون سرعه المعالج ويدفعونها لاقصى حد ممكن بس برضوا مع استخدام هالبرنامج بامكانك انك تنزل من سرعه المعالج يعني Downclock لسرعه المعالج فابالتالي بيشتغل معاك ابرد وبالتالي تتخلص من مشكله الحراره الزايده اللي ممكن تجيب نهايه جهازك. ومثل ماذكرت سابقا ماراح تفرق معك كا مستخدم اذا ماتشغل العاب على جهازك ولا انت راعي قرافيك (فيديو). المهم بعد ماتنزل هالبرنامج ركبه بجهازك وشغله اول ماتشغله ممكن يقولك ان هالبرنامج لم يتم اختباره مع التعريف الموجود حاليا بجهازك الخ الخ .. كمل ماعليك. اول مايفتح معك البرنامج القسم اللي بالوسط اسمه Driver Settings فيه زر على اليمين اضغط عليه زي ماهو موضح بالصوره التاليه

اول ماتضغط عليه يبي يطلع مستطيل صغير فيه اربع خيارات اختار اول واحد من اليسار زي ماهو واضح بالشكل التالي

يبي يفتح لك نافذه جديده حط علامه صح على Enable Driver-Level وطبق الخطوات التاليه زي ماهو موضح بالاشكال التاليه

بعد كذا احتمال يطلب منك اعاده تشغيل الجهاز عشان يطبق الخيارات اللي انت اخترتها مع بدء التشغيل. وعشان تتاكد انك ماشي صح حمله هالاداه GPU-Z وشف بالاسفل الـ GPU Clock اذا هي 200 زي ماخترت فا تمام وبامكانك متابعه اداء وحراره الكرت من خلال الضغط على Sensors طبعا الكرت درجه حرارته ماراح تفرق معك كثير اذا انت ماتشتغل عليه يعني تبي تلقاه بين 57 و60 درجه وهي طبيعيه لكن مع الشغل والضغط عليه بجهازي مثلا صار مايتعدى 77 درجه مع العلم انها الى 85 درجه طبيعي بس اهم شي ما توصل من 90 درجه وطالع لان اقصى درجه لكرت انفيديا يتحملها هي 105 درجه وللمعلوميه كل مابرد المعالج كل ماطال عمره والصور التاليه ماخوذه من جهازي الصوره الاولى لجهازي بدون ماشتغل عليه والصورة الثانيه وانا حارقه حرق بالشغل وكانت درجه حراره الغرفه اثناء الاختبار حوالي 28 درجه

في الختام بشكل عام لتجنب ارتفاع حراره جهازك وبالتالي عمر اطول لجهازك دائما حاول تخليه على طاوله عشان مروحه التبريد تقدر تسحب الهوا وطلعه بدون مايكون فيه اي عائق يعني مو تكتمه على مخده ولا على كرسي واخرتها تقول وش فيه جهازي صار حار بعدها بفتره تلقى جهازك خرب مشاكل الحراره تقصر من عمر الجهاز هذا اذا ماتعدى الامر وانتهى بلحظتها المهم اذا ماعجبتك الحركه هاذي بامكانك ترجع جميع اعدادات كرت الشاشه عندك من نفس النافذه اللي عدلت منها السرعه فوق كلمه Apply فيه زر اسمه Default اضغطه ويلغي التغيرات اللي سويتها واي اظافه على الموضوع او سؤال لا تتردد تظيفه كا تعليق على الموضوع .